Ginpalawig sang Energy Regulatory Commission (ERC) ang pagpauntat sa pagutod sang serbisyo sang kuryente para sa residential kag non-residential consumers nga wala pa nakabayad sang ila electric bill.
Sakop sang bag-o nga direktiba ang mga bayranan halin Agosto tubtob Oktubre 2026 bilang kabahin sang tikang sang gobyerno sa tunga sang nagapadayon nga national energy emergency.
Ginpasugtan man sang ERC ang mga kabalayan nga nagagamit sang 200 kilowatt-hours ukon mas manubo pa kada bulan nga ipaliban ang pagbayad sang ila bill kag hulugan ini sa sulod sang indi magnubo sa tatlo ka bulan.
Apang ginlaygayan sang ahensya ang mga may kapasidad nga magbayad sang bug-os nga bill nga himuon gihapon ini.
Ginsugo man sang ERC ang mga electric distribution utilities kag iban pa nga kumpanya sa sektor sang kuryente nga ipatuman ang pareho nga flexible payment scheme agud mabuligan ang mga konsumidor.
May tubtob Oktubre 30, 2026 ang mga distribution utility sa pagsumite sang report sa ERC bilang pamatuod nga ila ginapatuman ang direktiba.
