Nagpahayag sang reaksiyon ang isa ka human rights kag environment advocate may kaangtanan sa daku nga halit sa kabukiran sa bahin sang Brgy. Ned, Lake Sebu, South Cotabato.
Suno kay Lexi Acosta, Human Rights kag Environment Advocate, sa interview sang Bombo Radyo Koronadal, iya ginpahayag nga bangud sa padayon nga pagpatigayon sang mga minahan sa kabukiran sa pila ka bahin sang South Cotabato, ginabutang sa indi maayo nga kahimtangan ang pagkaon, tubig, kag ikaayong lawas sang mga pumuluyo, indi lang sang probinsya kundi sang bug-os nga pungsod.
Dugang pa kay Acosta, kinahanglan nga magtingog ang mga pumuluyo kag maghimo sang nagakaangay nga mga tikang agud ipalab-ot sa mga local nga pamunuan ang panawagan nga untaton ang mga minahan sa bug-os nga probinsya sang South Cotabato.
Nagpanawagan man liwat si Acosta sa mga opisyales sang gobyerno kag mga pumuluyo nga mangin bukas sa mga epekto sang pagmina agud nga gilayon na ini nga mauntat.
