KORONADAL CITY – Naglab-ot sa masobra P700, 000.00 ang inisyal nga damyos nga ginbilin sang sunog sa duha ka mga panimalay sang pamilya Almeron sa Purok Maligaya, Brgy. Magsaysay, Koronadal City.
Sa eksklusibo nga interview sang Bombo Radyo Koronadal kay Mr. Rodolfo Almeron, tag-iya sang nasambit nga puluy-an, indi nila mahibaluan kung ano ang gintunaan sang sunog apang may nabatian sila nga lupok antes pa man ang pag-ibwal sang kalayo.
Suno kay Manong Almeron, pasado alas 11 nagluntad ang sunog apang mag ala-1 sa hapon na nakaresponder ang mga bombero kag naubos na tupok sang kalayo ang ila panimalay.
Depensa naman sang BFP-Koronadal, manug-ala-una sa hapon na sila nakabaton sang report angot sa sunog kag gilayon sila nga nagresponder apang nalamon na sang kalayo ang nasambit nga mga puluy-an.
Sa subong nga bulan sang Marso bilang Fire Prevention month, duha na ka insidente sang sunog na ang napagkit apang isa lamang dire ang residential fire kag ang isa ang sa basura nga nagdaku ang kalayo.
Nagapadayon naman ang panawagan sang BFP sa tanan nga mangin alerto kag maghalong sa tanan nga tion agud malikawan ang sunog.
