Ginabantayan sang Department of Social Welfare and Development (DSWD) ang kahimtangan sang mga residente nga naapektuhan sang bag-o nga pag-alburoto sang Bulkang Kanlaon sa Negros Island.
Suno kay DSWD Secretary Rex Gatchalian, ginmanduan na niya ang mga field office nga magpreparar kag maghatag sang kinahanglanon nga suplay sa mga apektado nga komunidad.
May yara na sang igo nga naka-preposition nga Family Food Packs (FFPs) sa Visayas, lakip ang sobra 192,000 ka FFPs sa Negros Island Region kag dugang nga 100,000 ka FFPs sa Region 7 (Central Visayas).
Suno kay Gatchalian, mahimo pa dugangan sang central office ang mga suplay kon magpadayon ang pag-alburoto sang bulkan kag maglapad ang epekto sini sa kabuhi kag pangabuhi sang mga residente.
Ginpahayag man sang kalihim nga ginapasiguro sang administrasyon indi lamang ang pagkaon sang mga apektado nga pamilya, kundi lakip ang mas hapos kag komportable nga pagpabilin nila sa mga evacuation center.
