KORONADAL CITY – Yara na sa kustodiya sang Banga PNP ang anay barangay chairman sang Barangay Liwanay, Banga South Cotabato matapos ang ginpatigayon nga operasyon sang mga otoridad sa mismo nga puluy-an sang suspek.
Ginkilala ang drug suspek nga si Mariano “Tikboy” Funla, residente sang Purok Bo. 1, Barangay Liwanay nga nagserbe sa sulod sang 9 ka tuig bilang barangay chairman sang ila nga lugar.
Sa interbyu sang Bombo Radyo Koronadal kay Brgy. Chairman Jimmy, isa sa masobra 100 ka mga drug surfacing personalities sa ila nga barangay si Funla kun diin aminado ini nga sadto nagagamit siya kag nagaduso sang ilegal nga droga.
Apang, nagbag-o na suno pa ini kag wala niya ginalauman nga mangin target sang raid ang iya nga puluy-an kaina sang kaagahon.
Ginpangunahan sang RPSB-Region 12 kag Banga PNP ang pagserbe sang search warrant sa puluy-an sang suspek kun diin nakuha sa posisyon sini ang pila ka mga empty sachet nga may mga residue sang ginapatihan nga shabu kag nakalain-lain nga drug paraphernalia.
Sa sibong natalana nga pasakaan sang kaso nga paglapas sa RA 9165 ang naarestar nga anay barangay official.
