KORONADAL CITY– Tuman nga kakulba kag nataranta suno pa ang mga tawo sa dako nga parte sang Riyadh Saudi Arabia makaligad ang mabaskog nga lupok nga kasubong sang mabaskog nga kilat.
Sa sini ginlaragway ni Bombo Correspondent Boyet Forro ang nagluntad nga pagpalupad sang ballistic missile sang Yemeni Rebels sa nasambit nga pungsod.
Sa interbyu sang Bombo Radyo Koronadal kay Forro, ginpahayag sini nga madamo sang nagpati nga isa lamang ini ka mabaskog nga kilat rason nga nagguruwa ang mga ini kag nagtan aw sa kahawaan kun malain ang paniempo.
Apang wala suno pa sang indikasyon nga indi manami ang panahon rason nga diri na sila ginkulbaan kun ano ang nagaluntad.
Kasunod suno pa sang pagsigabong ang pagkahulog sang dalagko nga debris gikan sa kahawaan.
Sa pihak sini, dako sa gihapon ang ila nga pagpasalamat ilabi na ang mga OFW’s sa lugar bangud nakahibalo ang mga ini nga nakadepensa ang pungsod Saudi Arabia sa anoman nga kinagamo nga kahimuan sang mga rebelde.
Dugang pa ni Forro, nga indi ini ang una nga tion nga nagpanggamo ang yemeni rebels bangud sang nagligad nga mga tinuig may ginpasigabong man ang mga ini sa nga sakop sa gihapon sang Saudi rason nga nagadoble sila sa paghalong.
