Tiniyak ng Bangko Sentral ng Pilipinas (BSP) na magpapatuloy ang kanilang serbisyo sa publiko tuwing Biyernes, kahit na nakikiisa sila sa mga hakbang ng pamahalaan upang makatipid sa enerhiya. Mananatiling bukas ang onsite cash operations ng BSP sa kanilang mga pangunahing tanggapan sa BSP Head Office sa Maynila, Security Plant Complex sa Quezon City, at sa mga regional offices at branches sa buong bansa mula 9:00 a.m. hanggang 2:00 p.m., Lunes hanggang Biyernes.
Patuloy din nilang tatanggapin ang mga transaksyon na may kinalaman sa BSP-acquired real properties at mga pisikal na dokumento sa BSP Hub sa Maynila tuwing Biyernes.
Bukod dito, ang BSP Online Buddy (BOB) chatbot ay mananatiling available 24/7 at maaaring ma-access sa BSP website, Facebook Messenger, at mobile app. Sa pamamagitan ng BOB, maaaring magsumite ng reklamo ang mga financial consumers tungkol sa mga produkto at serbisyong pinangangasiwaan ng BSP-supervised institutions.
Magpapatuloy din ang operasyon ng BSP Store sa pagbebenta ng commemorative coins at iba pang merchandise ng central bank, na maaaring bilhin sa kanilang online facility.
Sa kabila ng mga energy conservation measures, tiniyak ng BSP na hindi maaapektuhan ang kanilang mga serbisyo sa publiko at magpapatuloy ang operasyon ng bangko sa mga itinakdang araw.
