SURALLAH, SOUTH COTABATO– Ginkasubo sang pamilya kag mga kaupdanan sa Sangguniang Bayan sang Surallah ang pagtaliwan sang No. 1 councilor sang Surallah, South Cotabato makaligad nga gin-atake sa kurason.
Ini ang ginkumpirmar sa Bombo Radyo Koronadal ni Surallah Mayor Antonio Bendita.
Suno kay Mayor Bendita, ginbawian na sang Kabuhi si Councilor Ronnie Escleto sa edad 56-anyos.
Nagapangape suno pa ang konsehal upod ang staff sini kaina sang aga sang gin-atake.
Gilayon ini nga gindala sa pinakamalapit nga klinika apang dead on arrival na ang opisyal.
Bangud sini, tuman nga nagakasubo sa karon ang bug-os nga banwa sang Surallah bangud sa nasambit nga insidente.
Nagpalab-ot naman sang pagpakigsimpatiya kag kasubo ang LGU Surallah bangud sa kamatayon ni Councilor Escleto.
