KORONADAL CITY -Nagapanawagan ang mga otoridad sa bata ni Sultan Kudarat Governor Pax Mangudadatu nga magsungka na matapos nga ini ang ginatudlo nga prime suspect sa pagpatay sa mag-asawa nga lending collector sa banwa sang Lutayan.
Ginpahayag sa Bombo Radyo Koronadal ni PSI Herman Luna, hepe sang Lutayan Municipal Police Station nga si Naga Mangudadatu ang nagpanguna sa lima ka kalalakihan nga nagsulod sa puluy-an sang mag-asawa nga Jose kag Marissa Ballion kag ginluthang ang mga ini.
Suno kay Luna, si Naga ang tag-iya sang lending kun diin nagatrabaho ang duha apang madugay na nga wala makaremit sang kwarta.
Naguwa sa imbestigasyon nga antes pa man matabo ang insidente kahapon sang aga nakaangkon sang pagbinaisay sa tunga sang mga biktima kag suspek.
Mangin ang salakyan sang bata sang gobernador ang na-identify man sang mga testigo.
Sa subong ginapangita na ang suspek samtang ginahulat ang tikang nga himuon sang amay sa natabo.
Nahibaluan nga ang alkalde sang banwa sang Luyatan kun diin natabo ang krimen ang utod man sang suspek samtang ang amay nga gobernador ang kasamtangan nga Regional Peace and Order Council (RPOC) Chairman sang Region 12.
