KORONADAL CITY – Nagtuga sang kahadlok sa mga residente sa banwa sang Tantangan, South Cotabato ang ginhimo nga panibag-o nga pagsalakay sang mga ginapatihan mga rebelde nga NPA sa isa ka Banana Plantation.
Sa interbyu sang Bombo Radyo Koronadal kay PCI Berlin Pampolina hepe sang Tantangan PNP, ginabulubanta nga yara sa halos 10 ka mga armado nga kalalakihan ang nagpatigayon sang pag-atake kun diin sa nasambit nga insidente, ginkuha sang armado nga kalalakihan ang armas sang security guard nga ginkilala kay Shane Edwin Gregorio.
Suno kay Pampolina, ginsalakay sang armado nga grupo ang nasambit nga plantasyon kun diin nahimo pa nila nga hadlukon ang guwardiya didto.
Sa subong, nagapadayon ang imbestigasyon sang South Cotabato PNP sa nagluntad nga pagsalakay sang nagpakilala nga mga myembro sang rebelde sa nasambit nga lugar.
Samtang, ginpasiguro naman sang kapulisan ang seguridad sa pihak sang hitabo kag ginpasalig nga yara sa generally peaceful ang banwa sang Tantangan.
Kadungan sini, gin-awhag ni PCI Berlin Pampolina hepe sang Tantangan PNP ang mga pumuluyo nga mangin alerto ang mga residente kag makaangkon sang kooperasyon sa mga otoridad.
