Sin-o bala ang indi pagkiligon kun adlaw-adlaw ikaw nga ginatimplahan sang kape sang imo kahagugma,bana ukon asawa.
Indi bala sa pamatyagan mo espesyal ka?
Apang paano kun ang ini nga kape nga nagapakilig sa imo amo man gali ang rason sang imo mangin kamatayon.
Didto sa Michigan, may isa ka lalaki nga ginsilutan sang mamag-an nga sentensiya matapos mapamatud-an nga guilty sa pagbutang sa kape sang iya asawa sang high doses sang sleeping pills adlaw-adlaw.
Si Therese Kozlowski ang nagfile sang divorce gikan sa iya bana nga si Brian, sang June sang 2018 pa apang nagpadayon sila nga nagaistar sa isa lang ka balay.
Si Brian pa gani ang nagatimpla sang kape para sa iya adlaw-adlaw apang gin-gamit gali ini sang bana nga oportunidad agud paimnun siya sang delikado nga doses sang diphenhydramine, isa ka antihistamine nga ginagamit sa pagbulong sa allergies kag insomnia.
Sang may nabatyagan si Therese kag nagduda sa iya bana, didto kag nag install siya sang hidden cameras aud hibaluon ang ginahimo sang bana.
Kag didto natukiban nga sa indi na maisip nga kahigayunan nga kaangay nga ginahiluan na siya sang iya bana.
Matapos ginkasuhan, napamatud-an nga guilty si Brian kag ginpamatbatan sang lima ka tuig nga probation kag 60 ka adlaw sa presuhan nga iya pa serbehan kun weekend lang.
Ginkadismaya naman sang asawa ang mamag-an nga sentensya sa iya bana.
