Nag agaw-atensyon sa pageant community si anay Chief Presidential Legal Counsel Atty. Salvador Panelo matapos mangin miyembro sang Selection Committee sa ginpatigayon nga Miss Universe Pakistan 2026.
Kabahin si Atty. Panelo sa pagpili sang nagdaog sa amo nga pageant sa grand coronation night sang Agosto 18, kun sa diin nakauha sang tigalawas sang Lahore nga si Misbah Arshad ang korona bilang opisyal nga representante sang Pakistan sa palaabuton nga Miss Universe pageant.
Ang pageant sang Pakistan ginadumalahan sang Yugen Group nga nakabase sa Dubai kag ginapanguluhan sang Filipino entrepreneur nga si Josh Yugen bilang national director.
Ang amo man nga organisasyon ang may uyat sang mga prangkisa sang Miss Universe Pakistan, Miss Universe Egypt kag Miss Universe Bahrain.
Bangud sini, regular nga nagapartisipar ang pila ka kilala nga personalidad kag eksperto halin sa Pilipinas sa ila mga aktibidad.
Kilala si Atty. Panelo bilang anay tagpamaba sang presidente kag chief legal counsel sang administrasyon ni anay President Rodrigo Duterte, antes sang iya pagpartisipar sa international beauty pageant.
