Nagapabilin sa red alert status ang Bureau of Fire Protection (BFP) Koronadal agud masiguro ang madasig nga pagresponde sa mga emerhensya sa tion sang pagselebrar sang Undas 2026.
Sa interview sang Bombo Radyo Koronadal, ginpahayag ni Fire Officer 2 Darryl Jade B. Cabangal sang Operations Section sang BFP Koronadal, nga naka-deploy ang ila emergency personnel sa tatlo ka mayor nga sementeryo sa syudad kag magapabilin ang deployment tubtob Nobyembre 2.
Naka-full forc e man ang ila partner responders, lakip ang City Disaster Risk Reduction and Management Office (CDRRMO), Philippine Red Cross, City Health Office kag mga volunteer responders, agud maghatag sang nagakaigo nga assistance sa mga pumuluyo kag bisita.
Pinaagi sa amo nga deployment, mas mapadasig ang pagresponde sa posible nga mga insidente pareho sang medical emergencies, aksidente kag iban pa nga hitabo sa mga sementeryo nga ginadagsa sang mga tawo. Ginpahayag man ni Cabangal nga may yara gihapon sang mga personnel nga naka-standby sa fire station agud masiguro nga padayon ang pagresponde sa mga sunog kag iban pa nga emergency calls sa nagkalain-lain nga bahin sang syudad.
Ginpahanumdom man sang BFP ang publiko nga mag-obserbar sang fire safety precautions, maglikaw sa mga aktibidad nga mahimo mangin halitan sang sunog kag magpangayo gilayon sang bulig sa mga naka-deploy nga responders kon may emerhensya.
