KORONADAL CITY– Nangin madinalag-on ang ginpatigayon nga search warrant implementation sang Isulan PNP sa panimalay sang anay mamamahayag kag bana sini sa Kalawag I, Isulan, Sultan Kudarat.
Ginkilala ang mag asawa nga sanday Anwar kag Noraisa Husain nga anay mamamahayag sa isa ka local radio station nga nakabase sa syudad sang Cotabato.
Sa interbyu sang Bombo Radyo kay P/Supt. Daniel Celestino, ang hepe sang Isulan PNP nga sa inisyal nga impormasyon may yara sang mga nakuha nga apat ka sachet sang ginapatihan nga shabu,armas kag mga bala.
Dako naman ang pagpati sang mga kapulisan nga may yara sila sang ginatago nga droga bangud una na nga nagguwa ang mga pangalan sang mga ini nga may kaangtanan sa iligal nga droga.
Ang mag asawa ang nagapanag-iya sang tatlo ka dalagko nga panimalay, mga luxury cars kag malapad nga taramnan rason nga naangot ang mga ini sa droga.
