Ginalantaw sang Office of the Ombudsman nga himuon nga state witness ang anay Department of Public Works and Highways (DPWH) Secretary Manuel Bonoan sa kaso nga may kaangtanan sa ginapahayag nga anomalya sa mga flood control projects.
Suno kay Ombudsman Jesus Crispin Remulla, may yara na sang kasugtanan para sa kooperasyon ni Bonoan bilang state witness.
Ginpahayag niya nga importante ang ihibalo sang anay kalihim nahanungod sa operasyon sang departamento kag ini makabulig sa pagpaklaro sang mga kaso nga ipasaka batok sa mga responsable.
Ginpasiguro man sang Ombudsman nga magapangayo sila sa Sandiganbayan nga kuhaon si Bonoan bilang isa sa mga respondents agud mahimo siya nga opisyal nga state witness.
Una na nga ginpasakaan si Bonoan sang kaso nga plunder kaupod sanday Senator Jinggoy Estrada, anay DPWH National Capital Region Assistant District Engineer Denryl Caesar Sanchez Cortuna, District Engineer Manny Bumagat Bulusan, kag District Engineer Arturo Lombres Gonzales Jr.
Naarestar si Bonoan sang Hunyo 1 bangud sa non-bailable nga kaso nga plunder.
Apang, ginpahanugutan sang Sandiganbayan ang bahin sang iya mosyon para sa house arrest bangud sa iya tigulang na nga pang-edaron kag seryoso nga kondisyon sa panglawas.
