KORONADAL CITY – Padayon nga ginahibalo sang Cotabato PNP kun sin-o ang responsable sa panibag-o nga insidente sang pagpangluthang nga ginkapilas sang duha ka tawo nga himata sang isa ka engineer.
Ginkilala ang mga pilason nga biktima nga sanday Homer Mamasapano Jr, 34 anyos kag ang iya 11 anyos nga bata.
Base sa imbestigasyon, ginratratan sang bala sang ginapatihan nga riding in tandem suspects ang Toyota pick-up nga ginasakyan sang mga biktima sa bahin sang Ramon Rabago Sr. Avenue samtang pauli na sa ila puloy-an sa Tanghal Subdivision.
Suno kay Cotabato PNP PIO PMaj. Jude del Carmen sa interbyu sang Bombo Radyo Koronadal, nakaangkon sang igo sang bala sa wala nga kamot si Homer samtang sa wala nga abaga naman sa iya bata.
Sa subong yara na sa luwas nga kondisyon ang mag-amay makaligad ang insidente.
Sa subong wala pa nahibal-an sang mga otoridad kun ano ang motibo sa nasambit nga pagpangluthang.
Nahibaloan nga ang amay sang 34 anyos nga biktima nga si Homer Mamasapano Sr. isa ka empleyado sang Cotabato City District Engineer’s Office.
Nagluntad ang insidente pila ka adlaw makaligad ang pag-ambush naman sa Maguindanao provincial state prosecutor nga si Atty. Tocod Ronda kag duha ka kaupdanan sini.
