Ginapanawagan ni Atty. RJ Sustiguer, president sang South Cotabato Chamber of Commerce and Industry, nga himuon nga adlaw-adlaw nga pamatasan ang konserbasyon sang tubig agud mangin preparado sa posible nga kakulang sang suplay sini sa palaabuton.
Sa interview sang Bombo Radyo Koronadal, ginpahayag ni Sustiguer nga kinahanglan mangin responsable ang kada isa sa paggamit sang tubig kag likawan ang mga binuhatan nga nagadul-ong sa pag-usik sini.
Ginpahanumdom man niya ang publiko nga indi lamang magsalig sa padayon nga suplay sang tubig, kundi maghimo sang mga tikang pareho sang pagtipid sa paggamit, pag-recycle sang nagamit na nga tubig kag pagtipon sang reserba para sa tion sang kakulangan.
Dugang pa ni Sustiguer, indi dapat mangin rason ang barato nga bayad sa tubig agud balewalaon ang importansya sang pagtipig sini.
Suno sa iya, ang simple nga mga tikang sa konserbasyon sang tubig sang kada panimalay kag negosyo daku nga bulig sa komunidad agud maprotektahan ang suplay sang tubig para sa masunod nga mga tinuig.
