Ginserbihan sang panibag-o nga warrant of arrest si anay Bamban, Tarlac Mayor Alice Guo may kaangtanan sa tatlo ka kaso sang paglapas sa Republic Act No. 3019 ukon Anti-Graft and Corrupt Practices Act.
Gin-isyu sang Pasig Regional Trial Court Branch 67 ang warrant, kag lakip sa kaso ang 11 pa ka iban nga indibidwal.
Nagtalana ang korte sang P90,000 nga piyansa para sa kada isa ka kaso.
Kasamtangan nga detenido si Guo sa Correctional Institution for Women sa Mandaluyong City matapos siya sentensyahan nga guilty sang Pasig court sa kaso nga qualified human trafficking kag sentensyahan sang reclusion perpetua ukon life imprisonment.
Ginsentensyahan man sang life imprisonment ang iya mga co-accused nga sanday Rachelle Malonzo Carreon, Jaimielyn Cruz, Walter Wong Rong, Wang Weili, Wuli Dong, kag Nong Ding Chang.
Ginmanduan man sila sang korte nga magbayad sang P2 milyon nga multa sa kada kaso.
Ginmando man sang korte ang pagkumpiska sa P6 bilyon nga Baofu compound, kag ang permanente nga pagkuha sang registration sang Baofu Land Development Inc., Hongsheng Gaming Technology Inc., kag Zun Yuan Technology Inc.
