Masinadyahon nga aginanunsyar ang aktres nga si Therese Malvar nga engaged na siya sa iya nobyo nga direktor kag writer nga si Jaime Morados.
Ginpabutyag ni Malvar ang masadya nga balita paagi sa iya social media account kun sa diin ginpaambit niya ang mga laragway sang proposal kaupod ang Bible verse nga, “I have found the one whom my soul loves” halin sa Song of Solomon 3:4.
Ginpahayag man niya sa caption sang iya post ang isa ka short apang sweet nga mensahe bilang pagpamatuod sang iya pagsugot sa proposal.
Nagpaabot naman sang ila pagdayaw kag pagpakigbahin sa kalipay ang pila ka mga artista lakip sanday Kyline Alcantara, Barbie Forteza, Rita Daniela, kag Iza Calzado.
Ginpaambit man ni Morados ang video sang proposal nga ginhiwat sa atubangan sang ila pamilya kag malapit nga mga abyan.
Ginpili sang magkahagugma nga mangin pribado ang ila relasyon sa nagligad nga mga tuig, apang nagapakigbahin man sila sang pila ka mga laragway sa social media.
Nagapaabot naman subong ang ila mga tagasuporta sang ila palaabuton nga kasal.
