Ginpasiguro sang Commission on Elections (COMELEC) nga wala sang legal nga basehan ang pagkanselar sang 2028 National Elections bangod ginamando sang 1987 Philippine Constitution ang regular nga paghiwat sang piniliay.
Suno kay COMELEC Chairman George Erwin Garcia, wala sang opisyal ukon ahensya sang gobyerno nga may gahum nga magpugong sa eleksyon suno lamang sa ila luyag.
Apang posible nga mapalawig ukon maisol ang piniliay kun may seryoso nga mga sitwasyon kasubong sang kinagamo, terorismo, ukon pagkaguba kag pagkadula sang mga kagamitan nga kinahanglan sa eleksyon.
Gindugang ni Garcia nga indi mahimo nga baliskadon sang ordinaryo nga layi nga ipasa sang Kongreso ang mga probisyon sang Konstitusyon nga nagatalana sang iskedyul sang national elections.
Naghalin ang isyu matapos ginpahayag sang kampo ni Vice President Sara Duterte ang mga balita parte sa ginadiskusyon suno pa sa Kamara nga posible nga indi paghiwaton ang eleksyon sa 2028 paagi sa pagpalawig sang termino sang mga opisyal ukon pagbag-o sang sistema sang gobyerno.
Ginpanginwala man ni Garcia nga may opisyal halin sa Malacañang nga nagpalapit sa COMELEC agud maghatag sang mando ukon direktiba bahin sa ginatawag nga “no-election scenario.”













