-- ADVERTISEMENT --

Ginpaathag sang kampo ni Senador Ronald “Bato” Dela Rosa nga indi pa nagakahulugan sang pgasentensya ang pagbaton sang Senate Ethics Committee sa reklamo batok sa senador.

Paagi sa iya abogado nga si Atty. Israelito Torreon, ginpahayag nga ang pagdeklarar sang komite nga “sufficient in form and substance” ang reklamo isa lamang ka bahin sang proseso kag indi pa pinal nga desisyon nga may nalapas nga mga pagsulundan ang senador.

Suno kay Torreon, kinahanglan anay pormal nga mahatag sa senador ang reklamo agud makasumiter ini sang iya sabat.

Ginkumpirma man niya nga nabaton na sang opisina ni Dela Rosa ang dokumento.

Nagasalig ang kampo nga makasumiter sila sang sabat sa sulod sang deadline nga ginpatuman sang komite kag mangayo nga i-dismiss ang reklamo.

Ginpanginwala man sang abogado nga ginpabay-an sang senador ang iya opisina, bangud padayon pa ini nga nagatrabaho bisan wala si Dela Rosa sa pisikal nga pag-atender.

Ginpahayag niya nga wala ini nagatambong bangud nagaatubang sa posibilidad sang pag-aresto may kaangtanan sa warrant kag posible nga pagsurrender sa International Criminal Court (ICC).

Suno pa sa abogado, may posibilidad nga magpakita ang senador kun ang mga alegasyon batok sa iya pagadalahon sa lokal nga korte.

Madumduman nga ang grupo nga Wag Kang KuCorrupt amo ang nagpasaka sang ethics complaint batok kay Dela Rosa bangod sa malawig nga iya pagkadula sa opisyal nga mga katungdanan bilang senador.

Bisan pa sini, nagpabilin nga kumpiyansa ang iya kampo nga pagabasehan sang komite ang desisyon sini sa mga pagsulundan kag ebidensya nga ipresentar sang duha ka bahin.