-- ADVERTISEMENT --

Samtang ang iban nagapakigbato sa traffic, nagahulat sang jeep ukon nagadali magsakay sang bus pakadto sa trabaho, si Racheal Kaur may mas mataas nga problema, indi siya dapat ma-late sa iya flight!

Isa ka iloy sa Malaysia, eroplano ang iya adlaw-adlaw nga service pakadto sa opisina kag pauli sa ila balay.

Adlaw-adlaw siya nagabugtaw alas-4 sang kaagahon agud makaabot sa airport alas-5 kag makalupad antes mag-alas-6.

Pag-abot sa Kuala Lumpur, nagasugod siya sa trabaho alas-7:45 sang aga kag nagapauli liwat paagi sa eroplano pagkatapos sang duty.

Antes mag-alas-8 sang gab-i, yara na siya sa ila balay kag makaupod na ang iya mga kabataan.

Mas makatilinga pa, suno sa iya, mas barato pa ini kumpara mag-renta sang puluy-an malapit sa iya opisina.

Bilang Assistant Manager sa Finance Department sang isa ka airline, nakabenepisyo siya sa discount sa plane tickets.

Halín sa $474 kada bulan, nagnubo sa $316 ang iya nagagasto sa pamasahe.

Sa baylo nga magreklamo sa kalawigon sang biyahe, ginakuha na lang niya ang oras sa eroplano paagi sa pagpamati sang musika, pagpamalandong kag pagtan-aw sa mga talan-awon.

Mas gusto man niya nga magtrabaho sa opisina kumpara work-from-home bangud mas produktibo siya sa personal nga pakig-angot sa iya mga katrabaho.

Para kay Racheal, indi importante kun pila ka beses mag-check in sa airport sa sulod sang isa ka adlaw, basta indi maapektuhan ang trabaho kag may oras gihapon siya para sa pamilya.

Sa iban, kapoy nga biyahe ini.

Pero kay Racheal, daw adlaw-adlaw lang nga flight schedule ang pagpakita sang iya dedikasyon sa trabaho kag gugma sa pamilya!