May yara sang natalana nga lugar para sa community fireworks display sa Koronadal City samtang ginapahugot man sang kapulisan ang pagbantay sa mga baligyaanay sang firecrackers kag pyrotechnic devices agud mapunggan ang pagbaligya sang mga iligal nga palupok.
Sa interview sang Bombo Radyo Koronadal, ginpahayag ni PCOL Isralene Lauren, Provincial Director sang South Cotabato PNP, nga isa sa ila ginapatigayon nga tikang amo ang pagdugang sang mga kapulisan sa mga lugar nga gintalana para sa pagbaligya sang pabuto agud masiguro nga wala sang iligal nga mga palupok nga makalusot kag mabaligya sa publiko.
Ginpabutyag man ni Lauren nga may yara sang kaugalingon nga pabrika sang firecrackers kag pyrotechnic devices sa South Cotabato nga gin-usisa sang ila talatapan.
Suno sa iya, nakapasar ang nasambit nga pabrika sa inspeksyon, mga kinahanglanon nga papeles kag mga pagsusi nga ginpatigayon sang kapulisan.
Gindugang pa niya nga suno sa resulta sang ila inspeksyon, luwas man gamiton ang mga produkto nga ginahimo kag ginapaguwa sang amo nga pabrika.













