Ginklaro ni Atty. Rainer Dela Fuente, anay financial investigator sang Anti-Money Laundering Council (AMLC) kag expert witness sang depensa ang distinction sa tunga sang “return of capital” kag “return on capital” sa tion sang impeachment trial ni Vice President Sara Duterte.
Suno kay Dela Fuente, ang “return of capital” nagatumod sa pagbawi sang aktwal nga kantidad sang prinsipal nga investment, samtang ang “return on capital” nagatumod sa ganansia ukon kita nga natigayon halin sa isa ka investment.
Ang ini nga pagpaklaro gintunaan sang pagpangusisa ni Senador-judge Joel Villanueva angut sa konsepto, kasunod sang testimonya ni Atty. Suzette Balucanag-Punay—abogado sang GenCorp Industries Inc. kag Metro City Chow Foods Corporation.
Sa nagligad nga hearing, ginpahayag ni Punay nga si Duterte ginaalegar nakabaton sang P2.14 milyones halin sa GenCorp sa tunga-tunga sang 2022 kag 2025 bilang “return of capital,” sa pihak sang iya ginreport nga una nga puhunan nga nagalab-ot lamang sa diutay nga kapin sa P46,000.
Ginpaathag ni Dela Fuente nga kon ang orihinal nga kapital nabawi na sing bug-os, apang ang investors padayon nga nagabaton sing mga bayad, kinahanglan nga mahibaluan kon bala ining masunod nga mga bayad nagabug-os sang ganansia, kompensasyon, ukon iban pa nga sahi sang kita.













