-- ADVERTISEMENT --

Nagbayluhanay sang mga pag-atake ang Iran kag ang Estados Unidos pagkatapos nga naglunsar sang opensiba ang Tehran batok sa mga installation sang drone kag missile sang Estados Unidos sa Kuwait, kasunod sang pagpamomba sang Amerika sa Qeshm Island sa Strait of Hormuz.

Suno sa Iranian Army, target sang ila operasyon ang mga pasilidad sang US sa Ali Al Salem Air Base sa Kuwait.

Ginreport sang Kuwait nga ang ila mga air defense system gin-activate sa pag-intercept sang nagasulod nga mga drone.

Antes sini, ang mga fighter jet sang Estados Unidos naghimo sang airstrike sang Martes sang gab-i batok sa isa ka missile launch site sa Qeshm Island.

Nagpahayag ang isa ka opisyal sang militar sang Estados Unidos nga ini kabahin sang pagtimalos sa mga nauna nga pag-atake sang Iran batok sa mga tinawo kag pasilidad sang Amerika.

Samtang, ginkumpirmar sang Bahrain nga liwat sini nga na-intercept ang mga aerial attacks halin sa Iran sang Miyerkules. Ini ang ikatlo nga kaangay nga insidente sa pungsod sa sulod lamang sang isa ka semana.

Padayon nga nagalala ang tensyon sa rehiyon kasunod sang asud-asud nga operasyon militar sang magtimbang nga bahin.