-- ADVERTISEMENT --

Naghatag sang kalipay sa mga lokal nga manug-alaga sang baboy sa Polomolok ang pagpagwa sang lokal nga panguluhan sang tatlo ka Executive Order nga nagatuyo nga mabuligan ang industriya sang baboy kag mapunggan ang paglapta sang African Swine Fever (ASF).

Sa interview sang Bombo Radyo Koronadal, ginpahayag ni Amy Jean Jugador, isa ka lokal nga manug-alaga sang baboy sa banwa, nga ginpirmahan sang alkalde sang Polomolok sang Nobyembre 18, 2026 ang Executive Orders No. 073, 074 kag 075.

Suno kay Jugador, isa sa pinakamalawig nga ginapaabot sang mga hog raisers ang Executive Order No. 075 nga nagtakda sang minimum farmgate price nga ₱160 kada kilo sang buhi nga baboy. Mahimo pa ini nga magtaas depende sa panginahanglan sa merkado.

Samtang, nagaluntad ang Executive Order No. 073 nga nagatuyo nga mabuligan ang mga manug-alaga nga daku ang nalugi ukon napilitan nga untatan ang ila palangabuhian paagi sa bulig sang Department of Agriculture kag Office of the Municipal Agriculturist (OMAG), lakip ang pag-organisa sang mga asosasyon ukon kooperatiba agud makabalik sila sa pag-alaga sang baboy.

Samtang, ang Executive Order No. 074 ang nagadumili sa pagpasulod, pagpagwa kag pagbiyahe sang buhi nga baboy kag mga produkto sini sa banwa agud malikawan ang paglapta sang ASF.

Bangud sini, nagpanawagan si Jugador sa OMAG nga hugot nga ipatuman ang pagsulundan sa tanan nga pasuludan sang Polomolok, ilabi na ang pagdili sa pagsulod sang mga buhi nga baboy kag produkto sini halin sa iban nga lugar.