-- ADVERTISEMENT --

Ginkumpara ni Vice President Sara Duterte ang korapsyon sa isa ka “progressive disease” ukon balatian nga padayon nga nagalapta kag nagagamot na sa sistema sang gobyerno, nga suno sa iya nagapugong sa pag-uswag sang pungsod kag mas maayo nga palaabuton para sa mga Pilipino.

Suno sa bise presidente, daku nga babag ang korapsyon sa paghatag sang dugang nga oportunidad kag pagkab-ot sang kauswagan sa pungsod.

Gani, gin-awhag niya ang publiko nga mangin responsable nga pumuluyo paagi sa pagsunod sa mga kasuguan, pagsikway sa korapsyon, pag-atipan sa komunidad kag pagpangayo sang accountability sa mga opisyal sang gobyerno.

Samtang, magapadayon naman sa Huwebes ang impeachment trial batok sa bise presidente matapos ang tatlo ka adlaw nga untat bangud sa ASEAN Summit.

Ginapaabot nga magpresentar ang kampo sang depensa sang apat ka saksi. Tatlo sa ila ang magatalakay sa operasyon sang Cale88 Foods Corp., samtang ang isa magahatag sang pagpaathag parte sa Anti-Money Laundering Act (AMLA).