-- ADVERTISEMENT --

Ginhangkat ni Manila 3rd District Representative Joel Chua sa kampo ni Vice President Sara Duterte nga magpokus sa pagsabat sa mga alegasyon sang wala maideklarar nga manggad, sa baylo nga magpresentar lamang sang mga dokumento nga nagapamatuod sa legal nga pagparehistro sang ila negosyo.

Ini ang pahayag ni Chua antes ang pagpadayon sang impeachment trial sa Senado sa Nobyembre 19, kun sa diin apat ka testigo ang ginapaabot nga ipresentar sang depensa sa sulod sang duha ka adlaw nga trial.

Suno sa kongresista, wala ginakwestyon sang prosecution panel ang rehistro sang Cale88 Foods Corporation sa Department of Trade and Industry (DTI), lakip ang pag-aprubar kag pagparehistro sang banana chips nga produkto sini sa Food and Drug Administration (FDA).

Apang gin-athag ni Chua nga indi amo ini ang sentro sang kaso, kundi ang mga alegasyon nga may ginatago milyon nga pesos nga manggad kag kita nga wala suno pa gindeklarar sa financial records sang bise presidente kag sang iya bana nga si Manases Carpio.

Ginpunto man niya ang pagpahayag sang prosecution expert witness nga si Atty. Alex Cabrera, nga nagbanabana sang sobra P800 milyon nga wala suno pa madeklarar nga kita nga ginaangot kay Duterte.

Sa pihak sini, magapadayon ang impeachment proceedings sa Senado agud mahatagan sang tion ang kampo sang bise presidente nga ipresentar ang ila mga testigo kag sabton ang mga alegasyon nga yara sa Article II sang impeachment complaint, nga may kaangtanan sa unexplained wealth ukon indi mapaathag nga manggad.