-- ADVERTISEMENT --

Ginapaathag sang Department of Energy (DOE) ang masobra 100 ka mga gasolinahan nga gin-akusaran nga wala nagtuman sa ginapatuman nga pagnubo sang presyo sang petrolyo.

Suno kay Oil Industry Management Bureau (OIMB) Director Rino Abad, nakabisita ang ila grupo sa 213 ka gasolinahan halin Nobyembre 10 tubtob 13 agud usisaon kun nagpatuman ini sang price rollback.

Sa resulta sang inspeksyon, 114 sa mga gasolinahan ang nakita nga wala nagpatuman sang ginmando nga pagnubo sang presyo.

Bangud sini, ginhatagan sila sang 72 oras agud maghatag sang paliwanag, apang wala ginbaton sang ahensya ang ila mga rason.

Lakip sa mga sabat sang pila ka negosyante amo nga antes pa ginpatuman ang price rollback, nakabakal na sila sang ila stock sang petrolyo.

Bangud sini, ginpasang-at na sang DOE sa ila Legal Department ang mga report sang inspeksyon para sa dugang nga pag-usisa.

Kun mapamatud-an nga naglapas ang mga gasolinahan sa mga regulasyon, mahimo mag-atubang ang ila mga tag-iya sang pagpriso halin tatlo ka bulan tubtob isa ka tuig kag multa nga nagabalor sang P50,000 tubtob P300,000.

Mahimo man magpataw ang DOE sang administratibo nga mga silot, lakip ang multa ukon pagsuspender sang lisensya sang mga establisemento nga mapamatud-an nga naglapas sa pagsulundan.