Gin-awhag ni National Bureau of Investigation (NBI) Director Melvin Matibag ang kampo ni Bise Presidente Sara Duterte nga magpasaka sang pormal nga reklamo agud maimbestigaran ang ginaalegar nga pagpamahog kag pagpamilit sa pagpirma sang dokumento sa anay household staff sang Bise Presidente.
Ini matapos ginpahayag ni Atty. Paolo Panelo, tagpamaba ni Duterte, nga nagpakitluoy sang bulig kag pagluwas ang anay staff paagi sa mensahe nga iya ginpadala sang Nobyembre 16.
Suno kay Panelo, ginahuptan kuno sang pila ka indibidwal ang anay staff, ginapamahog ang iya kabuhi kag ginapilit nga magpirma sang dokumento, nga iya ginbalibaran.
Apang suno kay Matibag, kinahanglan nga magpasaka sang pormal nga reklamo kag maghatag sang ebidensya ang kampo ni Duterte agud maaksyunan sang NBI ang alegasyon.
Gindugang niya nga wala pa sila nakabaton sang pormal nga reklamo nahanungod sa amo nga insidente kag nga wala pa sang ebidensya, ang mga pahayag mahimo lamang makabig nga wala pa napamatud-an nga impormasyon.













