Ginkwestyon ni Atty. Salvador “Sal” Panelo ang imbestigasyon sang National Bureau of Investigation (NBI) may kaangtanan sa ginapatihan nga hulga ni Vice President Sara Duterte batok kay Pangulong Ferdinand Marcos Jr., First Lady Liza Araneta-Marcos, kag anay House Speaker Martin Romualdez.
Suno kay Panelo, naguwa sa pagpamatuod ni NBI Regional Director Atty. Jeremy Lotoc sa impeachment trial nga wala nahimo sang ahensya ang isa ka madalom kag komprehensibo nga imbestigasyon.
Ginpahayag ni Panelo nga wala sang klaro nga sabat ang NBI sa importante nga bahin sang alegasyon, labi na ang isyu sang ginapatihan nga assassin nga kuno ginsugo sa pagpanakit sa mga nasambit nga personalidad kon may malain nga matabo sa Bise Presidente.
Ginkwestyon man sang abogado ang ginapatihan nga indi pagtugma sang pagpahayag sang NBI kon ang pahayag ni Vice President Duterte isa ka conditional threat ukon isa gid ka direkta nga hulga.
Suno pa kay Panelo, mas importante nga usisaon ang mga hitabo nga nagpalibot sa pahayag sang Bise Presidente, lakip na ang iya ginapatihan nga mga hulga kag pagpamugos antes niya nahambal ang kontrobersiyal nga pahayag.
Dugang pa niya, posible nga ang ginhambal ni VP Sara isa lamang ka reaksiyon sa sitwasyon nga iya nabatyagan nga yara siya sa peligro.
Sa pihak nga bahin, nagapadayon ang impeachment trial batok kay Vice President Sara Duterte, nga nagasentro sa Article IV sang Articles of Impeachment nga may kaangtanan sa ginapatihan nga grave threats.
Ginapaabot nga magabalik sa witness stand si Atty. Jeremy Lotoc sa masunod nga pagpadayon sang hearing.
