-- ADVERTISEMENT --

Hindi pa matiyak ng Department of Foreign Affairs (DFA) kung magkakaroon ng pormal na paglagda sa kasunduan kaugnay ng Pax Silica Initiative sa pagbisita ni US President Donald Trump sa Pilipinas.

Ayon kay Foreign Affairs Secretary Ma. Theresa Lazaro, hindi pa prayoridad na kumpirmahin ang naturang kasunduan dahil nakatuon muna ang kaniyang tanggapan sa mga naging talakayan sa 49th ASEAN Summit at sa mga nakatakdang bilateral meeting ng Pilipinas at United States.

Una nang sinabi ni US Ambassador to the Philippines Lee Lipton na walang planong maglabas ng anunsyo tungkol sa Pax Silica sa ASEAN Summit. Aniya, daraan muna sa konsultasyon ng dalawang pamahalaan ang mga susunod na hakbang.

Samantala, nagpahayag ng pagtutol ang ilang grupo ng estudyante at progresibong organisasyon sa pamamagitan ng mga kilos-protesta bago ang pagdating ni Trump sa bansa. Ipinahayag ng mga ito ang kanilang pangamba sa posibleng implikasyon ng naturang inisyatiba.

Hinimok naman ng Malacañang ang mga grupo na magsumite ng position paper upang direktang maiparating sa pamahalaan ang kanilang mga saloobin at rekomendasyon.

Ayon sa Bases Conversion and Development Authority (BCDA), wala pang pinal na petsa para sa paglagda sa legal framework. Gayunman, inaasahan ng isang opisyal ng Department of Trade and Industry (DTI) na matatapos ang proseso bago matapos ang 2026.

Dagdag pa ni Lazaro, hindi naging bahagi ng mga talakayan sa ASEAN Summit ang mga protesta sa bansa dahil nakasentro ang mga pagpupulong sa mga usaping panrehiyon at ugnayang panlabas.