Nagpagwa na sang subpoena ang Senado para sa mga testigo nga ginhingadlan sang kampo depensa ni Vice President Sara Duterte agud mag-atubang sa pagpadayon sang impeachment trial sa Nobyembre 19 kag 20.
Ginkumpirmar ni Senate Secretary Renato Bantug nga naipadala na paagi sa elektroniko ang mga subpoena sa mga testigo nga ginapaabot nga maghatag sang ila testimonya.
Suno sa tigpamaba sang depensa nga si Atty. Michael Poa, nagaplano sila nga magpresentar sang walo tubtob napulo ka testigo agud sabton ang mga alegasyon batok sa Bise Presidente, lakip ang nahanungod sa iya ginaalegar nga wala mapaathag nga manggad.
Ginalauman nga magasugod na ang kampo depensa sa pagpresentar sang ila mga testigo sa pagbalik sang impeachment proceedings sa Senado sa Huwebes kag Biyernes.













