-- ADVERTISEMENT --

Patay ang isa ka regional-level most wanted person matapos nga ginapatihan nga nagbato sa mga pulis sa tion sang pag-arestar sa iya sa Purok Roxas, Barangay Concepcion, Koronadal City, South Cotabato.

Ginkilala ang suspek nga si Ricky Gayan Malo alyas “Bangus,” nga may ginapangatubang nga kaso nga Murder kag Attempted Murder base sa mga warrant of arrest nga ginpagwa sang Regional Trial Court Branch 37 sa General Santos City sang Enero 6, 2026.

Sa interview sang Bombo Radyo Koronadal kay Brgy. Kagawad Bobby Castillo sang Concepcion, Koronadal City, iya ginpahayag nga may ginpangatubang man ang nasambit nga wanted person nga mga kaso nga murder.

Suno sa report sang Koronadal City Police Station, ginpahayag nga sang gin-arestar na ang persona sang mga katapo sang Criminal Investigation and Detection Group – South Cotabato Provincial Forensic Unit 12, nagbato ini kag nagkuha sang kalibre .45 nga pistola nga nakasuksok sa iya hawak.

Bangud sini, nagpalupok sang iya service firearm si PMSg Isidro O. Elias Jr. agud sabton ang ginaalegar nga insidente.

Nakaagom sang pilas halin sa bala ang suspek kag gilayon nga gindala sa Provincial Hospital of South Cotabato, apang gindeklarar ini nga dead on arrival ni Dr. Glenn Michael A. Oyson.

Samtang, napilasan man ang iya kaupod nga si Fritzel John Sinsua Malo matapos maigo sang bala sa tuo nga bahin sang iya likod.

Gindala ini sa Allah Valley Medical Specialist Center, Inc. kag yara sa stable nga kondisyon samtang ginabulong.

Narekober sa lugar ang isa ka kalibre .45 nga pistola nga may unom ka bala sa magazine kag isa pa ka bala nga ginaalegar yara sa chamber sang armas.

Sa karon, yara na sa kustodiya sang CIDG South Cotabato Provincial Forensic Unit 12 ang napilasan nga wanted person samtang ginapreparar ang nagakaigo nga kaso batok sa iya.