-- ADVERTISEMENT --

Pagpaandam ang Philippine Atmospheric, Geophysical and Astronomical Services Administration (PAGASA) nga siyam ka lugar sa pungsod ang posible makaeksperyensya sang dangerous level nga heat index.

Base sa pinakabag-o nga forecast sang ahensya, posible maglab-ot sa 43 degrees Celsius ang heat index sa Zamboanga City kag Cotabato City.

Samtang, ginapaabot nga magtaas sa 42 degrees Celsius ang kainit sa Coron kag Puerto Princesa City sa Palawan, San Jose sa Occidental Mindoro, Dumangas sa Iloilo, Borongan kag Guiuan sa Eastern Samar, kag Dipolog sa Zamboanga del Norte.

Ginpaathag sang PAGASA nga ang heat index nga nagaabot sa 42 tubtob 51 degrees Celsius ginakabig na nga delikado bangud mahimo ini magresulta sa heat cramps kag heat exhaustion. May posibilidad man nga magtuga ini sang heat stroke nga mahimo magbutang sa peligro sang kabuhi.

Bangud sini, ginapaalintonan ang publiko nga mag-inom sing bastante nga tubig, likawan ang malawig nga pagbabad sa idalom sang init sang adlaw kag magpahuway sa matugnaw nga lugar, labi na sa oras sang udto agud malikawan ang epekto sang sobra nga kainit.