-- ADVERTISEMENT --

Naospital ang 32 ka pasahero matapos magbungguanay ang tanker ship nga Atlantic Asphalt kag cruise ship nga American Heritage sa Mississippi River sa New Orleans, Louisiana.

Suno kay New Orleans Mayor Helena Moreno, yara sa 180 tubtob 190 ka pasahero kag tripulante ang sakay sang cruise ship sang natabo ang aksidente.

Bangud sa puwersa sang pagbunggo, natumba kag nalunod ang cruise ship, samtang ang pila ka pasahero nahulog sa tubig.

Ginkumpirma sang mga awtoridad nga naluwas ang tanan nga sakay sang barko kag wala sa 32 nga ginadala sa ospital ang nakaangkon sang malubha nga pilas.

Sa pauna nga imbestigasyon, ginapatihan nga nadulaan sang kontrol ang tanker bangud sa posible nga depekto sa manibela antes ini nagbunggo sa cruise ship nga nakahimpang sa pantalan.

Gilayon nga nagresponde ang mga personahe sang pantalan, bombero, pulis kag mga sibilyan agud luwason ang mga pasahero nga nahulog sa tubig.

Temporaryo man nga ginsiraduhan sang US Coast Guard ang alagyan sang mga barko sa amo nga bahin sang suba samtang ginadeterminar pa ang kabangdanan sang aksidente.