-- ADVERTISEMENT --

Siyam ka mga raliyista ang nadakpan matapos punggan sang mga pulis ang ila pagmartsa pakadto sa Cultural Center of the Philippines (CCP) Complex sa Pasay City, diin ginahiwat ang ika-49 nga ASEAN Summit and Related Summits.

Sa pahayag sang Kilusang Mayo Uno (KMU), ginkondena sini ang pamaagi sang mga pulis sa pagpahalin sa mga nagprotesta nga naghalin pa sa Liwasang Bonifacio sa Manila. Ginpahayag man sang grupo nga may pila ka raliyista nga nasamaran kag gin-akusahan ang Manila Police District sang pagpangharas.

Ginkondena man sang Alliance of Concerned Teachers (ACT) ang ginatawag sini nga pagpang-abuso sang mga pulis, kag ginpabutyag nga kinamatarong sang mga raliyista nga ipahayag ang ila mga reklamo kag kabalaka.

Samtang, ginpahayag ni Palace Press Officer Claire Castro nga luyag ni Presidente Ferdinand Marcos Jr. nga mangin hapsay ang pagpatigayon sang summit agud mapakita sa mga lider sang iban nga pungsod ang maayo nga dagway sang Pilipinas.

Nagpanawagan man ini sa mga Pilipino nga magbinuligay sa pagpauswag sang pungsod kag pagsuporta sa administrasyon, sa baylo nga maghimo sang mga hublag nga mahimo makaapekto sa dagway sang Pilipinas sa atubangan sang kalibutan.

Sa pihak nga bahin, ginpasiguro sang National Capital Region Police Office (NCRPO) nga ipatuman sang mga pulis ang maximum tolerance sa pag-atubang sa mga nagaprotesta, apang indi nila pagtugutan nga makapalapit ang mga ini sa lugar nga ginahiwatan sang ASEAN Summit.