-- ADVERTISEMENT --

Sa edad nga 65 anyos, padayon gihapon sa pagdonar sang dugo si Walter Oljol bilang bahin sang iya adbokasiya sa pagbulig kag pagluwas sang kabuhi, matapos liwat nga nagpakigbahin sa Dugong Bombo 2026 sang Bombo Radyo Koronadal.

Sa interview sang Bombo Radyo Koronadal, ginpaambit ni Oljol nga anum na ka tuig siya nga aktibo nga nagadonar sang dugo kag nangin tradisyon na ini sa iya kabuhi.

Suno sa iya, nagumpisa ang iya adbokasiya sa handum nga makabulig sa mga tawo nga nagakinahanglan sang dugo. Sa pagligad sang panahon, nangin inspirasyon man ini agud mas hatagan niya sang importansya ang iya panglawas.

Ginpaambit man niya nga ginbag-o niya ang iya lifestyle kag gin-untat ang pag-inom sang makahulubog nga ilimnon kag iban pa nga bisyo agud mapabilin nga maayo ang iya kondisyon sa panglawas.

Bangud sini, gin-awhag ni Oljol ang iya kapareho nga senior citizens nga maayo ang kondisyon sang panglawas nga magdonar man sang dugo kag magpakigbahin sa mga bloodletting activities.

Para sa iya, indi dapat mangin balabag ang edad sa pagbulig sa isigkatawo, bangud ang simple nga pagdonar sang dugo mahimo mangin dako nga kahigayunan agud makahatag sang paglaum kag makaluwas sang kabuhi sang iban.