-- ADVERTISEMENT --

Padayon ang kampanya sang City Anti-Drug Abuse Council (CADAC) sang Koronadal batok sa ilegal nga droga paagi sa pagpalapnag sang impormasyon kag pag-edukar sa mga kabataan kag estudyante sa nagkalain-lain nga buluthuan sa syudad.

Sa interview sang Bombo Radyo Koronadal, ginpahayag ni Rey Calanao, Action Officer sang CADAC, nga padayon ang ila pagbisita sa mga buluthuan agud mahatagan sang nagakaigo nga kaalam ang mga estudyante parte sa malain nga epekto sang pag-usar sang ilegal nga droga.

Suno kay Calanao, importante nga mahibaluan sang mga kabataan ang posible nga halit sang droga indi lamang sa ila personal nga kabuhi kundi pati man sa ila pamilya kag komunidad.

Dugang pa niya, kabahin sang panikasog sang CADAC ang pagpalapnag sang husto nga impormasyon agud mapataas ang kaalam kag kahibalo sang mga estudyante sa peligro nga dala sang ilegal nga droga.

Paagi sa sini nga mga aktibidad, ginatuyo sang CADAC nga mapabakod ang paglikaw sang mga kabataan sa ilegal nga droga kag mapalapnag ang kahalagahan sang pagpakigbahin sang komunidad sa kampanya kontra droga.