Ginpahayag sang isa ka campus journalist sang Koronadal National Comprehensive High School (KNCHS) nga indi dapat tugutan nga mangin kabaylo sang Artificial Intelligence (AI) ang kaugalingon nga kaalam, talento kag abilidad sang isa ka journalist.
Sa interview sang Bombo Radyo Koronadal, ginpahayag ni Datu Mantawil, Anchor 1 Presenter sang Filipino Radio Broadcasting Team sang KNCHS, nga dapat maghalin gihapon sa kaugalingon nga kaalam kag paghangop sang campus journalist ang mga balita nga iya ginahimo.
Suno kay Mantawil, mahimo gamiton ang AI bilang bulig sa pagkuha sang ideya kag pagpaayo sang trabaho, apang indi ini dapat magbulos sa personal nga abilidad kag responsibilidad sang isa ka journalist.
Ginpahayag man niya nga dapat mangin giya kag suporta lamang ang AI sa mga mamamahayag kag indi magbulos sa ila papel sa pag-usisa, paghangop kag paghimo sang masaligan nga impormasyon.
Paagi sini, ginapahanumdom man ni Mantawil ang kasubong niya nga mga campus journalists nga gamiton sang husto ang teknolohiya samtang ginapabilin ang ila kaugalingon nga pagpaninguha, kritikal nga paghunahuna kag responsibilidad sa pamamahayag.











