Gin-awhag sang isa ka aktibo nga blood donor sa Syudad sang Koronadal ang publiko nga indi magkahadlok sa pagdonar sang dugo, bangud mahimo ini makabulig sa mga pasyente kag makaluwas sang kabuhi.
Sa interview sang Bombo Radyo Koronadal, ginpaambit ni Gerardo Cosico ang eksperyensya nga nagtulod sa iya nga mangin regular nga blood donor.
Suno kay Cosico, nag-umpisa ang iya interes sa pagdonar sang dugo sang nag-atubang ang iya pamilya sang medical emergency mga lima ka tuig na ang nagligad, kag nakaeksperyensya sila sang kabudlayan sa pagpangita sang dugo bangod sa kakulang sang supply.
Bangod sini, nagdesisyon siya nga mangin blood donor agud makabulig sa iban nga may pareho nga kinahanglanon.
Handum man niya nga makadonate kada tatlo ka bulan, apang tatlo lamang ka beses siya nakadonate sa sini nga tuig bangod sa iya kasako.
Ginpamatukan man ni Cosico ang kahadlok nga mahimo maubusan sang dugo ang isa ka donor, bangod ang lawas padayon nga nagaproduce sang bag-o nga blood cells agud ma-replenish ang nadula nga dugo.
Gani, gin-agda niya ang publiko nga indi magduha-duha sa pagdonar sang dugo, bangod ang simple nga paghatag sini mahimo mangin daku nga bulig kag makaluwas sang kabuhi sang iban.
