Nagpanawagan si Ma’am Jane sa publiko nga indi magkahadlok magdonar sang dugo kag mangin kabahin sa pagluwas sang kabuhi sang mga pasyente nga nagakinahanglan sini, ilabi na ang may blood type AB.
Sa interview sang Bombo Radyo Koronadal ginpahayag ni Jane, nga ikaduha na niya nga pagdonar sang dugo, matapos ang una niya nga eksperyensya sa SOCCSKSARGEN General Hospital.
Kabubut-on gid niya nga magdonar liwat bangud nahibaluan niya nga madamo nga pasyente ang nagakinahanglan sang dugo kag dako ang mabulig sini sa ila pagbulong.
Ginpahayag man niya nga may mga tawo nga nagaduhaduha magdonar bangud nahadlok nga basi malipongan ukon magluya pagkatapos sang proseso.
Apang ginpahanumdom niya ang publiko nga antes magkuha sang dugo, ginapaidalom anay ang donor sa nagakaigo nga health assessment agud masiguro nga maayo ang iya kondisyon kag kwalipikado ini nga magdonar.
Dugang pa ni Jane, wala sang rason nga mahadlok mag-try bangud paagi sa simple nga pagdonar sang dugo, mahimo nga makabulig sa paghatag sang ikaduha nga kahigayunan sa kabuhi sa mga pasyente nga nagakinahanglan sang blood transfusion.
Ang iya panawagan nangin kabahin sang Dugong Bombo 2026 nga ginpatigayon sa Koronadal City sa idalom sang tema nga “A Little Pain, A Life to Gain,” nga nagtinguha nga mapauswag ang partisipasyon sang publiko sa boluntaryo nga pagdonar sang dugo.
