Wala na nagaplano ang House prosecution panel nga magpresentar sang dugang nga ebidensya parte sa alegasyon sang wala mapaathag nga manggad nga nagalab-ot sa kapin ₱800 milyon nga ginatudlo kay Vice President Sara Duterte kag sa iya bana nga si Atty. Manases Carpio.
Suno kay Atty. Benjamin “Jay” Tolosa Jr., tigpamaba kag private prosecutor sang panel, bastante na ang mga dokumento kag ebidensya nga ila nasumiter sa impeachment court, gani pormal na nila nga gintapos ang ila pagpresentar sang kaso.
Ang kantidad nga kapin ₱800 milyon naghalin sa pag-usisa ni forensic accounting expert Alexander Cabrera sa mga rekord sang bangko, buhis, korporasyon kag SALN sang mag-asawa halin 2020 tubtob 2025.
Samtang, ginpanawagan ni House Deputy Speaker kag Iloilo Representative Janette Garin kay Duterte nga gamiton ang kahigayunan nga sabton ang mga alegasyon kag ipresentar ang iya bahin sa atubangan sang mga senador-huwes.
Sa pihak nga bahin, ginpahayag ni Atty. Michael Poa, tigpamaba sang depensa, nga ginalauman nila nga makapresentar pa sang walo tubtob napulo ka testigo antes matapos ang ila bahin sa impeachment trial.
Madumduman nga anum ka testigo ang una nang nag-atubang sa impeachment court, samtang 18 sa 24 nga una nga nalista nga testigo ang wala na ginpatawag agud magtestigo.
