Proud kag malipayon nga nagpakigbahin sa Dugong Bombo 2026 ang 65-anyos nga si Walter Oljol matapos liwat nga makadonar sang dugo bilang bahin sang iya adbokasiya sa pagbulig kag pagluwas sang kabuhi sang iban.
Sa interview sang Bombo Radyo Koronadal, ginpaambit ni Oljol nga anum na ka tuig siya nga aktibo nga nagadonar sang dugo kag ginakabig na niya ini nga isa ka tradisyon sa iya kabuhi.
Suno sa iya, nagsugod ang iya adbokasiya sa pagdonar sang dugo bangud sa handum nga makabulig sa mga tawo nga nagakinahanglan sini.
Sa pagligad sang panahon, nangin bahin na ini sang iya pang-adlaw-adlaw nga pagkabuhi kag nangin inspirasyon man agud mas hatagan niya sang importansya ang iya panglawas.
Ginpaambit man ni Oljol nga bangud sa iya pagdonar sang dugo, ginbag-o niya ang iya lifestyle kag gin-untat na ang pag-inom sang makahulubog nga ilimnon kag iban pa nga bisyo agud mapabilin nga maayo ang iya panglawas.
Bangud sini, gin-awhag niya ang iya kapareho nga senior citizen nga yara sa maayo nga kondisyon sang panglawas nga magdonar man sang dugo kag magpakigbahin sa mga bloodletting activity pareho sang Dugong Bombo.
Gindugang pa niya nga indi mangin balabag ang edad agud makabulig sa isigkatawo, ilabi na kon may kahigayunan nga makahatag sang paglaum sa mga pasyente nga nagakinahanglan sang dugo.
Para kay Oljol, dako nga kalipay ang mahibaluan nga paagi sa simple nga pagdonar sang dugo, mahimo siya mangin kabahin sa pagluwas sang kabuhi sang iban.
