Nag-uyon ang Swedish climate activist nga si Greta Thunberg kag Australian missionary nga si Sister Patricia Fox sa panawagan sang mga progresibong grupo nga ibasura ang inisyatibo sang Estados Unidos nga Pax Silica.
Ginapahayag nga kabahin sang proyekto ang pagpatindog sang sentro sang industriya sang artificial intelligence (AI) sa 1,620 ka ektarya nga duta sa New Clark City.
Apang, ginakontra ini sang pila ka grupo bangud amo ini ang ginakabig nga sagrado nga duta sang komunidad sang Aeta kag ginakabalak-an man ang mahimo nga epekto sini sa palibot.
Suno kay Thunberg, ang duta, pagtrabaho kag mga mineral dapat gamiton para sa kaayuhan sang katawhan kag kalibutan, kag indi para sa inaway kag handum sang mga gamhanan nga pungsod.
Samtang, ginpahayag ni Sister Fox nga ang Pax Silica isa pa ka tikang sang Estados Unidos sa pagpalapad sang iya gahum sa militar kag ekonomiya sa Pilipinas kag sa rehiyon.
Ginkastigo man niya ang pag-apil ni Australian Prime Minister Anthony Albanese sa inisyatibo.
Bisan ginpasalig sang gobyerno nga wala sang pirmahan nga kasugtanan nahanungod sa Pax Silica sa palaabuton nga ASEAN Summit, nagapadayon gihapon ang pagsupak sang mga grupo sa proyekto kag sa pagbisita ni US President Donald Trump sa Pilipinas.
