Ginpanindugan sang House Prosecution nga ang testimonya ni Atty. Suzette Balucanag-Punay—isa ka testigo para sa depensa ni Bise Presidente Sara Duterte—indi bastante agud pamatukan ang P817.87 million nga ginaalegar undeclared assets kag unexplained wealth nga natumod sa analysis sang forensic accounting expert nga si Alexander Cabrera.
Suno kay Deputy Speaker Francisco Paolo Ortega V, gingamit ni Cabrera ang specialized methodologies sa pagtipon sang iya forensic report. Ginkwestyon man sang House prosecution spokesperson kag Lanao del Sur Rep. Zia Alonto Adiong ang basehan sang mga pagpamatok ni Punay sa sini nga mga natukiban.
Sa tion sang impeachment trial, ginkumpirmar ni Punay nga nakabaton si Duterte sang P2.14 milyones halin sa GenCorp Industries sa tunga-tunga sang 2022 kag 2025, nga kuno bilang return on an investment sa branch sang Jollibee sa Davao City. Ginhatagan man niya sing igtalupangod nga ang Bise Presidente nagahupot sing ginabanta nga 20-porsiento nga interes sa kompanya.
Apang gin-ako ni Punay nga indi niya matumod ang orihinal nga kantidad sang investment kag indi man niya mapakita ang anuman nga written documentation agud mapamatud-an ang transaksyon.
Una na nga gintumod ni Cabrera ang P212.63 milyones nga gin-alegar wala gindeklarar nga kita halin sa GenCorp bilang kabahin sang kabug-usan nga P817.87 milyones nga wala mapaathag nga manggad nga ginaulamid kay Duterte.
Padayon nga nagadebate ang depensa kag ang prosekusyon sa sini nga mga natukiban sa tion sang impeachment trial sa nabilin nga Article II impeachment charge batok sa Bise Presidente.
