Nagapangayo sang hustisya ang pamilya sang walo ka tuig nga bata nga napatay matapos mabungguan sang police patrol car ang ila ginasakyan nga motorsiklo samtang nagahulat sang traffic light malapit sa overpass sa Koronadal City, Martes sang aga, Nobyembre 10.
Sa interview sang Bombo Radyo Koronadal, ginpahayag ni Meriam Salan Antiquera, 50-anyos nga lola sang biktima kag driver sang Yamaha Mio, nga nagahulat sila sang traffic light kaupod ang iya apo nga backrider sang nabungguan sila sang nagapadulong nga patrol car.
Suno kay Antiquera, madasig ang pagpadalagan sang patrol car kag wala nila namalayan ang pagpalapit sini. Bangud sang mabaskog nga impact, natumba ang motorsiklo kag nagtabog ang iya apo sa malapit nga bahin sang overpass.
Ginpahayag man sang lola nga naigo sa ulo ang bata kag gilayon nga gindala sa South Cotabato Provincial Hospital agud mahatagan sang medical treatment, apang wala na ini naluwas.
Ginkwestyon man ni Antiquera kon ngaa madasig ang pagpadalagan sang patrol car sa amo nga bahin sang karsada, ilabi na nga madamo ang sakay sini sang natabo ang insidente.
Nahibaluan nga ang Mitsubishi Strada pick-up/patrol car ginamaneho ni PCpl Elton John Javien Rombawa, 30-anyos, nga assigned sa SKPMFC kag residente sang President Quirino, Sultan Kudarat.
Base sa inisyal nga imbestigasyon sang Koronadal City Police Station Traffic Section, ang atubang nga Base sa inisyal nga imbestigasyon sang Koronadal City Police Station Traffic Section, ang atubang nga bahin sang pick-up ang nagbunggo sa tuo nga bahin sang motorsiklo.
Sa karon, nagapanawagan ang pamilya nga mahatagan sang hustisya ang pagkapatay sang bata kag mapanabat ang mga responsable sa insidente.
