Nangin daw eksena sa comedy movie ang paglagas sang duha ka magagmay nga biik sa South Carolina, United States, matapos nga nagpalagyo ini sa ila tag-iya kag naghatag sang indi kinaandan nga trabaho sa mga pulis.
Sa video nga gin-share sa social media, makita ang duha ka biik nga ginangalanan nga “Bacon Bits” nga ginlagas sang duha ka pulis sa isa ka talagsahon nga “hoof chase.”
Ang ila pagpalagyo temporaryo nga nagdisturbo sa kalinong sa lugar kag nagkinahanglan sang pagresponde sang kapulisan agud masiguro nga indi sila makahalit ukon magresulta sa aksidente sa palibot.
Suno sa kapulisan, nadakpan man nila ang duha ka “suspek” nga ginpasakaan pa kuno sang kaso nga “fleeing and squealing” bangud sa ila pagpalagyo samtang nagaginahod.
Sa ulihi, ginbalik ang duha ka “career cri-ham-inals” sa ila tag-iya.
Apang, suno sa police department, “No ham was done” ukon wala man sang may napilasan sa amo nga insidente.
Sa pihak sang dyutay nga kagamo nga ila ginhatag, wala man sang bacon nga nadugang sa police report!
