Nagapahayag sang pagkabalaka ang isa ka multicab driver sa Syudad sang Koronadal sa plano nga pagbalhin sang ila terminal sa Chinatown bangud posible nga makaapekto ini sa ila pangabuhian kag sa kahapsay nga pagbiyahe sang mga pasahero.
Sa interview sang Bombo Radyo Koronadal ginpahayag ni Rex Ayong, nga kapin 20 ka tuig na nga nagadrive sang multicab sa siyudad, nga bag-o lamang niya nahibaluan ang plano kag wala pa sang kompleto nga impormasyon nahanungod sa bag-o nga ruta.
Suno kay Ayong, mahimo ini mangin masako sa mga pasahero, partikular sa mga estudyante nga naandan na nga magsakay kag magpanaog sa ila kasamtangan nga terminal.
Posible man nga magdugang ang ila plete kag oras sang pagbiyahe kon mapatuman ang pagbalhin.
Ginakabalak-an man niya nga magnubo ang ila kita bangud posible nga magbuhin ang mga pasahero nga nagasalig lamang sa multicab bilang transportasyon.
Bangud sini, nagapanawagan si Ayong sa lokal nga panggobyerno nga konsiderahon ang kahimtangan sang mga driver kag pasahero kag repasuhon ang plano nga pagbalhin sang terminal agud malikawan ang dugang nga kabudlayan sa ila pangabuhian.
