Nagdangat na sa 33 ka tawo ang ginreport nga napatay sa mga pag-atake halin sa kahanginan ukon airstrikes sa Yemen nga ginatudlo sa Saudi Arabia, lakip ang mga kababainhan kag kabataan, suno sa mga media nga kaalyado sang Houthi movement.
Base sa report sang Houthi-run television station nga Al Masirah, nagapakita ang video footage sang mga rescuer nga nagakuha sang mga bangkay halin sa mga naguba nga building sa al-Shariyah, sa sidlangan sang kapital nga Sanaa.
Madamo man ang napilasan sa insidente, nga ginreport nga naglab-ot sa 39 ka tawo kag gindala sa ospital para sa pagbulong.
Samtang, wala pa sang opisyal nga pahayag halin sa Saudi-led coalition tuhoy sa alegasyon. Nagapadayon ang nagadugay na nga kinagamo sa tunga sang Houthi rebels kag mga puwersa nga ginasuportahan sang Saudi Arabia.
Mas naglala ini matapos magbalik ang mga pag-atake sa rehiyon bangud sang mas malapad nga tensyon nga may kaangtanan sa Iran.
Suno sa United Nations, sobra na sa 1,600 ka tawo ang napatay kag masobra 300,000 ang napilitan nga magbiya sa ila mga puluy-an halin sang nagbalik ang kinagamo.
Samtang, nagpanumpa si Houthi leader Mahdi al-Mashat nga magabalos ang grupo sa pinakabag-o nga mga pag-atake. Nagapabilin nga yara sa peligro ang mga sibilyan samtang nagapadayon ang inaway, nga nagadugang sa humanitarian crisis sa Yemen.
